ԱՆՁՆԱԿԱՆ ՀԻԳԻԵՆԱ

Խանութի անկյունում վաղուց կարելի էր նկատել մի սպունգ, որ օրեր շարունակ անհամբեր սպասում էր, թե երբ է սկսելու պայքարել բակտերիաների և մանրէների դեմ, որոնց նա չէր սիրում: Մի օր խանութ մտավ մի կին, ով իր աղջկա` Անուշիկի համար գնեց սպունգը:

-Հազի~վ,- ցնծում էր սպունգը, ես նոր ընկեր ունեմ, ում կպաշտպանեմ բակտերիաներից և մանրէներից…

Սակայն հիմա էլ սպունգը կախված էր լոգարանում: Նա շատ տխուր էր, հարևանությամբ պառկած էր օճառը, որ անընդհատ շնչում էր` տարածելով բույրն ամբողջ լոգարանով: Նա բողոքում էր սպունգին.

-Ինձ չի' սիրում Անուշիկը, ինձ հետ ընկերություն չի անում, բակտերիաներն ու մանրէները նրա լավագույն ընկերներն են, նա չի հասկանում` որքան վտանգավոր են նրանք: Ես փորձում եմ իմ անուշահոտությամբ նրան գրավել, սակայն նա միայն թրջում է երեսն ու ձեռքերը ջրով ու հեռանում:

Հաջորդ օրն Անուշիկը վազեց լոգարան ու բացականչեց.

-Մայրի~կ, քոր է գալիս, էլ չեմ դիմանում:

-Ի՞նչ է պատահել,-վազեց մայրիկը` լսելով Անուշիկը լացը:

Մայրիկի հետևից եկավ հորեղբայրը, ով մասնագիտությամբ բժիշկ էր:

Հորեղբայրը նայեց ձեռք չտված օճառին և նոր սպունգին և ամեն բան հասկացավ:

-Անուշի'կ, դու գիտես, թե ինչ է անձնական հիգիենան:

-Հիգիենա՞: Դա այն է, երբ լողանում ես և մաքրում ատամները:

-Ո՛չ միայն, հունարենից թարգմանաբար «հիգիենա» նշանակում է առողջարար, առողջություն բերող: Ա'յ, օրինակ, օրվա ընթացքում քանի անգամ ես լվանում ատամներդ,-շարունակեց հորեղբայրը:

-Դե՜, առավոտյան ահա այսպես (Անուշիկը ցույց տվեց, թե ինչպես է լվանում ատամները):

-Ատամները պետք է լվանալ առավոտյան և երեկոյան, ցանկալի է նաև ուտելուց հետո: Դա հեռացնում է ատամներից ուտելիքի մնացորդները: Եվ սպունգով դու ոչ մի անգամ չես լողացել, Անուշի'կ:

-Այն շատ կոշտ է,-սեղմեց ատամներն Անուշիկը:

-Մեր մարմինը շնչում է, և եթե չլվանաս, ապա մարմինը խցանվում է կեղտով, որտեղ թաքնվում են մանրէներն ու բակտերիաները: Առանց սպունգի հնարավոր չէ: Այն հեռացնում է կեղտը և պայքարում բակտերիաների և մանրէների դեմ: Դրա համար այն անպայման պետք է լինի կոշտ, չոր:

Երջանիկ սպունգից լոգարանում հոսում էր ջուրը… Նրանք օճառի հետ միասին լավ աշխատեցին և ոչնչացրին բոլոր վնասակար մանրէներն Անուշիկի մարմնից: Եվ սպունգն ու օճառը դարձան փոքրիկ Անուշիկի լավագույն ընկերները:

Սիրելի՛ ընթերցող, մեզանից յուրաքանչյուրն էլ կարիք ունի անձնական հիգիենայի` մեր հոգիների անձնական հիգիենայի… Գուցե այսօր էլ դու սպունգի նման քո տանը՝ ինչ-որ անկյունում, շատ զգուշությամբ պահում ես Աստվածաշունչ, սակայն այն երբեք չես օգտագործում սեփական անձի մաքրության համար:

Հիշի՛ր, անկյունում դրված և երբեք չբացված ու չընթերցված Աստվածաշունչը չի կարող մաքրել քո հոգին մեղքից: Եթե ուզում ես լինել պաշտպանված ու մաքուր մեղքից, դու կարիք ունես ճանաչելու Հիսուս Քրիստոսին, որովհետև Աստծո Խոսքն ասում է. «Ապա եթե մեր մեղքերը խոստովանենք, Նա հավատարիմ է ու արդար, որ մեր մեղքերը ների մեզ և մաքրի մեզ ամեն անիրավությունից» (Ա Հովհաննես 1.9):

«Սերմնացան» ամսագիր