Սովորել լսել Աստծուն

Անասելի օրհնություններ են սպասում նրանց, ովքեր ուշադրություն են դարձնում Աստծո ձայնին։

Տերը ցանկանում է, որ ուշադրություն դարձնենք Իր վրա, բայց երբեմն մենք անտեսում ենք Նրա ձայնը և բաց թողնում Նրա օրհնությունները:  Աստծուն լսել սովորելը նույնքան կարևոր է, որքան Նրա հետ խոսելը, եթե ոչ ավելին:  Ընդհանրապես, մեզ համար շատ ավելի հեշտ է աղոթել, քան հանգիստ նստել և սպասել, թե ինչ է Նա ասում:

Քանի որ երկկողմանի զրույցը կարևոր է հարաբերություններ զարգացնելու համար, Տիրոջ ձայնը լսելը քրիստոնեական կյանքի կարևոր մասն է:  Երբեմն մենք ունենք այն պատկերացումը, որ փրկվելուց հետո մենք պարզապես ինքնաբերաբար ճանաչում ենք Նրան:  Բայց դա ճիշտ չէ որևէ տեսակի հարաբերություններում:  Ինչպես հաղորդակցության միջոցով մենք ճանաչում ենք մեկ այլ անձի, այնպես էլ ավելի ճանաչում ենք Աստծուն Նրան լսելու և խոսելու միջոցով:

Մեզ ոչ միայն ականջներ են պետք Նրա ձայնը լսելու համար.  մեզ նաև պետք է խորաթափանցություն, որպեսզի ճշգրիտ հասկանանք, թե ինչ է Նա ասում:  Սուրբ Գրքի վրա հիմնված լինելը ամրացնում է մեր խորաթափանցությունը և պաշտպանում մեզ խաբեությունից։  Երբևէ մտածե՞լ եք, որ Աստծո Խոսքի անտեսումը Նրանից մերժում է:  Տերն անընդհատ կանչում է. «Երանի՜ թե Իմ ժողովուրդն Ինձ լսեր»(Սաղմ. 81.13):  Նա պատրաստ է խոսել նրանց հետ, ովքեր կխոնարհեցնեն իրենց անձերը, ժամանակ կհատկացնեն լսելու և հնազանդորեն կպատասխանեն այն ամենին, ինչ Նա ասում է։

Աղբյուրը՝ intouch.org

Թարգմանեց Մերի Հովհաննիսյանը