Լույս խավար աշխարհում

Եկե՛ք հավատարիմ լինենք աղոթելու իշխանավորների և խավարի մեջ ապրող մյուսների փրկության համար:

Ա Տիմոթեոս 2-ում Պողոս առաքյալը մեզ մի քանի ուղեցույց է տալիս ապրելու այնպես, ինչն ուրիշներին կգրավի դեպի Հիսուսը:  Առաջին հերթին՝ բոլոր մարդկանց, այդ թվում մեր կառավարող իշխանությունների համար աղոթելը կարող է հանգեցնել «խաղաղ և հանդարտ կյանքի՝ ամենայն աստվածապաշտությամբ և անկեղծությամբ»։  Սա գիտակցելը կարող է մարդկանց մոտ ցանկություն առաջացնել «ճշմարտության ճանաչմանը հասնել» և փրկվել Աստծո ցանկության համաձայն (Ա Տիմ. 2.2-4):

Չկա արդարություն կամ բարություն ընկած մարդկային սրտում, որը մեզ արժանի է դարձնում փրկվելու Աստծո աչքում:  Այնուամենայնիվ, Նա ընտրել, սիրել և փրկել է մեզ՝ որպես «Իր շնորհի չափազանց հարստությունը՝ Քրիստոս Հիսուսով մեզ հանդեպ ցույց տրված բարությամբ» (Եփեսացիս2.7):  Ընկած հրեշտակները երբեք չեն կարող ներում ստանալ,  բայց փրկագնված մարդկությունը կլինի Աստծո շնորհի հավերժական գավաթը գալիք դարերում:

Երբ ապրում ենք արդարությամբ և արժանապատվությամբ, մենք լույսերի պես ենք դառնում այս խավար, մեղավոր աշխարհում:  Այդ կերպ մենք ցույց ենք տալիս ուրիշներին ճանապարհը դեպի Տեր Հիսուս Քրիստոսը, որպեսզի նրանք նույնպես ստանան Աստծո փրկությունը և նույնպես փառք տան Նրան հավիտյան:

Ուրեմն՝ եկե՛ք հավատարիմ լինենք «խնդրանքներով, աղոթքներով, բարեխոսությամբ և գոհությամբ ... հանուն բոլոր մարդկանց», քանի որ դա լավ է և ընդունելի Աստծուն (Ա Տիմ. 2․1, 3)։

Աղբյուրը՝ intouch.org

Թարգմանեց Մերի Հովհաննիսյանը